NCRPO chief sa mga pulis: Human rights respetuhin

MANILA, Philippines — Hiniling ni National Capital Region Police Office (NCRPO) chief Major General Debold Sinas sa mga pulis sa  Metro Manila na respetuhin ang karapatang pantao ng mamamayan kasabay sa ipinatutupad na enhanced community quarantine sa Luzon.

“My instruction to my men is clear. Despite the implementation of policies relative to the community quarantine, due respect for the rights of our citizens must always be observed,”  pahayag ni Sinas.

Ang pahayag ay ginawa ni Sinas bilang reaksyon sa banta  ng isang opisyal ng Manila Police District (MPD)  na babarilin niya ang mga pasaway na  lalabas sa kanilang bahay ngayong ipinaiiral ang community quarantine.

Tiniyak ni Sinas  sa publiko na hindi kukunsintihin ng NCRPO ang anumang pang aabuso na gagawin ng mga pulis habang sila ay nasa operasyon.

Anya ang insidente na kinasasangkutan ni Station 3 commander Police Lieutenant Colonel Reynaldo Magdaluyo ay iniimbestigahan na at kung mapatunayang nagkasala ay agad tatanggalin sa puwesto.

“Di pa naman siya relieved. Nag-iinquire pa ang District Director, sa social media kasi ‘yun nagviral kaya iniimbestigahan pa,” pahayag ni Sinas.

Nanawagan din si Sinas sa publiko na sundin ang  guidelines  na ipinatutupad ng pamahalaan sa panahon na naka  mandatory quarantine ang Metro Manila.