10 bus ikinalat ng DOTr para sa health workers

MANILA, Philippines — Nagdeploy ng 10 bus  ang Department of Transportation (DOTr) upang libreng mag­hatid at magsundo ng mga health workers sa pinapasukan nilang mga pagamutan sa iba’t ibang lugar sa Metro Manila kahapon.

Ayon kay Transportation Secretary Arthur Tugade, kailangan na tulungang makabiyahe ang mga health wor­kers papasok sa trabaho, sa gitna na rin ng umiiral na Luzon-wide enhanced community quarantine.

Dakong alas-7:00 ng gabi nang simulan ang deployment ng mga bus sa dalawang pick-up points, kabilang ang Parañaque Integrated Terminal Exchange (PITX), at BFCT East Metro Transport Terminal sa Marikina City, sa tulong ng Land Transportation Franchising and Regulatory Board (LTFRB), Philippine Coast Guard (PCG), Department of Public Works and Highways (DPWH), at HM Transit.

Ang unang ruta ng mga bus ay mula PITX - Quezon City General Hospital via Makati/Pasig, at maghahatid ng mga health workers mula PITX patungo sa Makati Medical Center, St. Lukes Medical Center - BGC, Rizal Medical Center, The Medical City- Ortigas, East Avenue Medical Center, Philippine Heart Center, Lung Center of the Philippines at Quezon City General Hospital.

Ang ikalawang ruta naman ay ang PITX - San Lazaro / Chinese General Hospital via Manila/Taft, na maghahatid naman ng mga health workers mula PITX, patungo sa Pasay City General Hospital, Adven­tist Medical Center Manila, Philippine General Hospital, Jose Reyes Memorial Medical Center, Manila Doctors Hospital, University of Sto. Tomas Hospital, San Lazaro Hospital,  Jose R. Reyes Memorial Medical Center, at Chinese General Hospital and Medical Center.

Samantala ang ikatlong ruta ay ang BFCT - San Lazaro Hospital via East Ave/E. Rodriguez, na bibiyahe mula BFCT patungong Quirino Memorial Medical Center, East Avenue Medical Center, Philippine Heart Center, Lung Center of the Philippines, Providence Hospital Capitol, Medical Center, St. Lukes Medical Center - East Avenue, University of Sto. Tomas Hospital at San Lazaro Hospital.

Nilinaw naman ng DOTr na ang mga naturang ruta ay maaari namang mabago depende sa data at kahilingan mula sa Department of Health (DOH).

Siniguro naman ng DOTr na ang naturang bus service ay tatalima sa ipinatutupad na containment protocols ng DOH, kabilang ang pag-obserba sa social distancing, body temperature checks, at regular na pag-disinfect ng sasakyan matapos ang bawat biyahe nito.

Samantala, bilang tugon naman sa panawagan ni Tugade, nangako na si Grab Php President Brian Cu sa DOTr na tutulong sila sa paghahatid ng mga health workers sa mga pagamutan, nang walang dapat bayarang pamasahe. Wala pa namang detalye na inilalabas ang DOTr sa natu­rang serbisyo.

Bilang karagdagan, sinabi ng DOTr na magtatayo rin sila ng operations center para sa motorpool para naman sa mga opisyal at miyembro ng Inter-Agency Task Force for the Management of Emerging Infectious Diseases (IATF-EID).

Related video: