Navotas ipatutupad ang 4-day work week

MANILA, Philippines — Simula ngayon, Marso 16, ipatutupad na ng  Pamahalaang Lungsod ng Navotas ang 4-day work week sa lunsod kaugnay ng deklarasyon ng Pangulo ng state of public health emergency.

Ayon kay Mayor Toby Tiangco, ang compressed work schedule ay bahagi ng pagsisikap ng lunsod na isulong ang social distancing at makatulong na maiwasan ang paglaganap ng Coronavirus Di­sease 2019 (COVID-19). 

Kasabay nito, tiniyak ni Tiangco sa publiko na mananatiling bukas ang NavoServe Social Services One-Stop Shop mula Lunes hanggang Biyernes, 8AM hanggang 5PM.

Aniya, mahalaga na  makakuha ng medical assistance at guarantee letter. Makaaasa ang mga Navoteño, lalo na ang mga hirap sa buhay, na makakakuha ng tulong at ayudang kailangan  mula sa  pamahalaan. 

Nakasaad sa Memorandum Order No. TMT 2020-0151 na mananatiling bukas ang frontline services mula Lunes hanggang Biyernes. Susunod ang mga empleyado sa shifting schedule at kailangan nilang magtrabaho ng 10 oras bawat araw sa loob ng apat na araw.