Crackdown vs sex dens sa POGOs
Inilunsad ng PNP
MANILA, Philippines — Ipinag-utos na kahapon ni Philippine National Police (PNP) Chief General Archie Gamboa ang malawakang crackdown laban sa prostitusyon ng mga kababaihang Chinese sa pagsusulputan ng kontrobersyal na Philippine Offshore Gaming Operators (POGOs) sa bansa.
Ayon kay PNP Spokesman Police Brig. Gen. Bernard Banac, partikular na binigyan ng direktiba ni Gamboa ay ang tanggapan ni Women and Children Protection Center (WCPC) sa ilalim ng pamumuno ni Brig. Gen. Alessandro Abella.
Una rito, sinabi ni Presidential Spokesperson Salvador Panelo na iimbestigahan ng pamahalaan ang napaulat na talamak na pamamayagpag ng Chinese prostitution dens sa mga POGO.
Nitong huling bahagi ng 2019 ay nakapaglunsad ang PNP-ACG ng mga raid sa POGOs na nagresulta sa pagkakasagip sa 140 kababaihang biktima habang nasa 455 namang suspect ang nasakote.
Samantalang maging ang National Capital Region Police Office (NCRPO) ay naglunsad din ng mga operasyon laban sa mga prostitution dens sa Metro Manila.
Magugunita na una nang ipinag-utos ni Pangulong Rodrigo Duterte ang paghihigpit sa mga POGOs upang mabawasan ang korapsyon, extortion at kidnapping na may kinalaman sa operasyon ng online gaming.
Sa tala, nasa 60 POGOs ang nag-o-operate sa bansa base sa data ng Philippine Amusement and Gaming Corporation (PAGCOR).
- Latest