Hepe ng QCPD binalaan vs illegal gambling
MANILA, Philippines — Binigyan ng ultimatum ni Philippine National Police chief Gen. Archie Gamboa si Quezon City police district director Col. Ronnie Montejo ng ultimatum upang sugpuin ang ilegal na sugal sa siyudad.
Sa panayam sa isang radio program nitong Biyernes, sinabi ni Gamboa na kanyang kakausapin si Montejo at bibigyan ito ng deadline upang wakasan ang operasyon ng jueteng, loteng at bookies sa Quezon City.
“Shape up or ship out” ang kautusan ng bagong talagang PNP chief ni Pangulong Duterte sa hepe ng QCPD.
“Bibigyan natin ng deadline si District Director Montejo at kapag hindi niya nasugpo ang illegal gambling sa QC ay hahanap tayo ng ibang kayang gawin ‘yun,” babala ni Gamboa sa panayam.
Ayon sa PNP chief, una na niyang binalaan ang mga opisyales ng kapulisan laban sa pagtanggap ng payola mula sa ilegal sa sugal.
“Once na may mahuli akong kumukuha sa illegal gambling eh makakatikim kayo sakin,” banta niya pa sa mga ito.
Sinabi pa ni Gamboa na may plano na siya kung pano susolusyunan ang korapsyon ng mga pulis pagdating sa ilegal na sugal.
Ngunit umapela siya at sinabing kakailanganin ng tulong ng publiko lalo na ng media sa pagkalap ng impormasyon laban sa mga tiwaling opisyal ng PNP.
Kamakailan ay inaresto ng mga operatiba ng PNP Criminal Investigation and Detection Group ang siyam na kubrador ng bookies sa QC.
Ayon sa impormasyon ng CIDG, ang ilegal na sugal sa lungsod at pinapatakbo ng kinilala nila na alyas “Tepang,” “Kit” at “Jessy Dadeo” na kanila umanong mga amo.
Ang mga ito diumano at nagbibigay ng payola sa isang opisyal ng PNP sa lungsod.
- Latest