Motor sumalpok sa poste, tinedyer patay
MANILA, Philippines — Namatay ang isang binatilyo habang kritikal naman ang isa niyang kaangkas nang sumalpok ang sinasakyan nilang motorsiklo sa isang poste ng kuryente kahapon ng madaling araw sa Pasay City.
Nakilala ang nasawi na si Raizaldy De Paz Macias, 17-anyos, habang nilalapatan ng lunas sa Pasay City General Hospital ang angkas na si John Joseph Foser, 16-anyos, kapwa nakatira sa 15th/16th Villamor Air Base, ng naturang lungsod. Parehong walang suot na helmet ang dalawang biktima.
Sa inisyal na ulat ng Pasay City Police, naganap ang insidente dakong alas-12:30 ng madaling araw sa may Leveriza Street sa Brgy. 22, ng naturang lungsod.
Ayon sa mga residente ng lugar, nakita nilang pabalik-balik ang motorsiklo hanggang sa makita nilang humaharurot na tila may tinatakasan. Hindi napansin ng nagmamaneho ang humps sa kalsada dahilan para mawalan sila ng kontrol at diretsong sumalpok sa poste ng kuryente.
- Latest
