Trader bulagta sa rider
MANILA, Philippines – Patay ang isang negosyante nang pagbabarilin ng isang rider sa Las Piñas City, kamakalawa ng hapon.
Nakilala ang nasawi na si Michael Padlan, 42, ng EVS Subdivision, Brgy. CAA/BF Intl., ng naturang lungsod.
Sa ulat ng Las Piñas City Police, naganap ang krimen dakong alas-5:30 ng hapon sa may Palace Street, Southland, Brgy. CAA/BF Intl kung saan minamaneho ni Padlan ang kanyang kulay gray na BMW X5.
Dinikitan ang biktima ng isang itim na motorsiklo saka siya pinagbabaril ng sakay nito na nakasuot ng panyo bilang maskara sa mukha. Agad na humarurot sa pagtakas ang salarin habang dinala ng kanyang misis ang biktima sa University of Perpetual Help Hospital ngunit hindi na ito umabot ng buhay.
Patuloy ang masusing imbestigasyon ng pulisya sa insidente para mabatid ang motibo sa krimen.
- Latest