Tapyas-presyo sa petrolyo
MANILA, Philippines — Taliwas sa pinangangambahang pagtaas sa presyo sa langis dulot ng tensyon sa Middle East, rolbak sa mga produktong petrolyo ang bubungad sa mga motorista ngayong darating na linggo.
Sa unang pagtataya ng mga oil experts, nasa pagitan ng P.30-P40 sentimos kada litro sa diesel at kerosene at posibleng P.10 kada litro sa gasoline ang ibababa.
Ngunit sa anunsyo ng Pilipinas Shell, nasa P.20 sentimos lamang sa diesel at P.30 sentimos sa kerosene ang iro-rolbak habang walang paggalaw sa gasolina. Ipatutupad ng Shell ang kanilang rolbak sa Martes dakong alas-6:00 ng umaga.
Sasabay sa Shell ang Petro Gazz na may P.20 sentimos rolbak sa Diesel.
Nauna na kahapon na nagpatupad ng rolbak ang independent player na Cleanfuel Station sa diesel sa halagang P.20 sentimos kada litro. Ngayong umaga naman magpapatupad ng rolbak ang Seaoil ng P.20 sentimos sa Diesel at P.30 sentimos sa kerosene.
Nabatid na unang sumirit ang presyo ng langis sa internasyunal na merkado sa unang bahagi ng nakalipas na linggo dahil sa tensyon sa pagitan ng Iran at Estados Unidos. Ngunit nakatulong ang paghupa ng banta ng digmaan sa muling pagbaba sa presyo ng krudo sa internasyunal na merkado.
- Latest