‘Richard Gomez’, kalaboso sa pananaksak

MANILA, Philippines — Inaresto ng mga awtoridad ang isang estudyante na kapangalan ng beteranong aktor na si Ormoc City Mayor Richard Gomez nang umano’y saksakin ang isang binatang nakaalitan niya sa Brgy. Sagad, Pasig City, nabatid kahapon.

 Ang suspek na si Richard Gomez (hindi ang aktor), 25, ay nahaharap sa kasong frustrated homicide  sa piskalya matapos na umano’y saksakin ng   basag na bote ang biktimang si Aldrin Collantes, 26, sa Villa Lamok, Brgy. Sagad.

 Lumilitaw sa ulat ng Pasig City Police na dakong alas-11:50 ng gabi ng Disyembre 17, nang maganap ang krimen, ngunit alas-5:00 ng madaling araw lamang kamakalawa nang maiulat ito sa pulisya.

 Nauna rito, masa­yang nag-iinuman ang biktima at kanyang mga kaibigan nang sa hindi tinukoy na kadahilanan ay makaalitan nito ang suspek.

 Sa kalagitnaan nang pag-aaway ay naka­dampot umano ng isang basyong bote ang suspek at binasag ito, at saka ginamit sa pana­naksak sa biktima.

 Kaagad namang naisugod sa Pasig Gene­ral Hospital ang biktima at isinailalim sa medikasyon, habang ang suspek naman ay naaresto ng mga rumes­pondeng tauhan ng Barangay Sagad Security Force at itinurn-over sa pulisya.