2 dinukot na Chinese nasagip; kidnaper na Pinoy, timbog
MANILA, Philippines — Nailigtas ng mga operatiba ng PNP-Anti-Kidnapping Group (PNP-AKG) ang dalawang Chinese habang nasakote naman ang Pinoy na kumidnap sa mga ito sa rescue operation sa Almanza Dos, Las Piñas City, ayon sa opisyal kahapon.
Sa press briefing sa Camp Crame, kinilala ni PNP-AKG Spokesman Police Lt. Col. Jowel Saliba ang mga nasagip na bihag na sina Mao Lina, alyas Wu You, 19 at Zhu Yong Jun Xiao Jun, 20, kapwa online casino worker, naninirahan sa Francisco Street, Alabang, Muntinlupa City.
Nakilala naman ang nasakoteng suspect na si Saturnino Matias Jr., 37, ng Brgy. Lipay, Villasis, Pangasinan.
Bandang alas-5:50 ng hapon kamakailan ng isagawa ang rescue operation sa Room 310, 3rd Floor sa Jasmin Building sa Almanza Dos sa lungsod ng Las Piñas.
Sa salaysay ng mga biktima nasa apartment sila ng isa nilang kaibigang kapwa Chinese sa Makati City nang dumating ang pitong katao kabilang ang dalawang Pinoy at isang Michael Chan noong Nobyembre 26, 2019.
Ang dalawang Pinoy ay nagpakilala umanong mga pulis ng Alabang, Muntinlupa City kung saan inakusahan ni Chan ang dalawang biktima na nagnakaw ng P 1.2 M halaga sa kanilang kompanya.
Matapos ito ang dalawang biktima ay ikinulong sa Police Station 1 sa Alabang sa lungsod ng Muntinlupa kung saan nakilala ng mga ito ang isa ring Chinese na si Chen Zhipeng na nakakulong sa nasabing kuwarto na binabantayan ng dalawang Pinoy.
Noong Disyembre 5, 2019 ay pinalaya si Chen Zhipeng malapit sa NAIA Terminal 2 sa Pasay City matapos na magbayad ng P 29,300 ang kaniyang pamilya sa mga kidnaper.
Ang insidente ay inireport ni Zhipeng sa mga awtoridad na ibinulgar ang kaniyang sinapit at isiniwalat na mayroon pang dalawang Chinese na pitong araw ng hawak ng mga kidnappers.
Agad namang nagsagawa ng rescue operations ang mga awtoridad na nagresulta sa pagkakasagip sa dalawa pang Chinese at nasakote naman si Matias.
Patuloy namang pinaghahanap ng PNP-AKG operative ang suspect na si Michael Chan at iba pa nitong mga kasamahan.
- Latest
