Binata hinoldap na, pinatay pa
Pinag-withdraw ng ina
MANILA, Philippines – Patay ang isang checker matapos na barilin ng mga holdaper at tangayin pa ang perang winithdraw sa ATM na pambili ng handa ng kanyang ina na magbi-birthday sa Quezon City, kahapon ng umaga.
Ang biktima ay nakilalang si Rogelio Maliglig Lopez, 41, binata, checker ng Zenco Sales Inc., at residente ng Brgy. Baesa, QC.
Sa imbestigasyon ng Criminal Investigation and Detection Unit ng Quezon City Police District (CIDU-QCPD), nabatid na ang insidente ay naganap dakong alas-5:00 ng umaga sa harap ng isang banko sa Quirino Hi-way, Brgy. Baesa, ng nasabing lungsod.
Inutusan umano ang biktima ng kanyang ina na i-withdraw sa ATM ang kanyang pension para gamitin na panghanda sa kanyang kaarawan.
Nang maka-withdraw na ang biktima at pauwi na ito ay bigla itong hinarang ng dalawang riding in tandem na suspects at agad siyang tinutukan ng baril ng rider at nagpahayag ng holdap.
Nagtangkang tumakbo ang biktima subalit mabilis na bumaba ang isa sa mga holdaper hanggang magpambuno ang dalawa.
Dito ay bumunot na ng baril ang holdaper at binaril ang biktima saka nilimas ang nasabing halaga at agad na tumakas.
Isinugod pa ang biktima sa Quezon City General Hospital subalit idineklara itong dead-on-arrival dakong alas-6:45 ng umaga.
- Latest