Holdaper kumasa sa parak, todas
MANILA, Philippines — Patay ang isang kilabot na holdaper makaraang kumasa sa mga pulis na aaresto sa kanya sa Brgy. Manresa, Quezon City, kamakalawa ng gabi.
Nakilala ang nasawi na si Mark Anthony Ruvivar, 26, ng Sapocoy Street, Brgy. Manresa, Quezon City.
Si Ruvivar ay natukoy na responsable sa dalawang insidente ng robbery with homicide na naganap noong November 7, 2019 sa tapat ng Robton Industry Inc. at sa Apacible St. corner J Aquino St. Brgy. Balingasa noong October 30, 2019.
Ilang testigo ang nagtungo sa Quezon City Police District at nagbigay ng description at nagturo sa hide-out ng suspek.
Dakong alas-8:30 ng gabi ay nagsagawa ng follow-up operation ang mga tauhan ng QCPD-CIDU laban kay Ruvivar sa Sapocoy Street, Brgy. Manresa.
Habang paparating ang mga pulis ay agad na pinaputukan ng suspek kaya gumanti ng putok ang mga awtoridad na nagresulta para tamaan ng bala sa katawan ang huli at naging sanhi ng kanyang kamatayan.
Narekober sa crime scene ang isang .38 Smith and Wesson na baril na may tatlong bala.
Ang security guard ng hospital na si Vincent De Villa ay nag-turned-over naman sa police investigators ng isang heat-sealed plastic sachet na naglalaman ng droga at P900 na nakuha sa pantalon ng suspek.
- Latest