Immigration inalerto vs illegal recruiters

MANILA, Philippines — Isinailalim sa heightened alert ang Bureau of Immigration laban sa mga illegal recruitment syndicates makaraang iulat sa kanila ng Department of Foreign Affairs na ginagamit ng mga illegal recruiter ang social media para iligal na makapagpadala ng overseas Filipino worker sa Iraq.

Sinabi ni BI Commissioner Jaime Morente na lahat ng mga immigration officer sa Ninoy Aquino International Airport sa Maynila at iba pang port ay inatasang busisiing mabuti ang mga Pilipinong bibiyahe papuntang Dubai.

Sinabi ni Morente na mahigpit na sinasala ng pamahalaan ang mga Pilipino dahil ipinagbabawal pa rin ang pagpapadala ng mga OFW sa Iraq habang idiniin niya na nagsisinungaling ang mga illegal recruiter na naghahayag na inalis na umano ang deployment ban sa naturang bansa.

Naatasan din ang mga immigration officer na imonitor ang pangalan ng mga OFW na iligal na na-recruit para magtrabaho bilang waitress sa mga restaurant sa Baghdad. 

“Tiyaking hindi makakalabas ng Pilipinas ang mga illegal OFW na nagpapanggap na mga turista. Pigilan sila at dalhin sa Inter-Agency Council Against Trafficking para sa kanilang proteksyon,” atas ni Morente sa mga BI officer.

Sa iskema ng mga illegal recruiter, ipinapadala muna ang mga illegally hired OFW sa Bangkok at Kuala Lumpur bilang turista bago didiretso sa Iraq.