Online stores tututukan ng PNP
MANILA, Philippines — Binalaan kahapon ng Philippine National Police (PNP) ang publiko sa mga naglipanang online transaction o pagsho-shopping sa internet ngayong nalalapit na ang kapaskuhan.
Ayon kay PNP Spokesman Brig Gen. Bernard Banac, tuwing ganitong panahon ay tumataas ang natatanggap nilang reklamo hinggil sa hindi magandang serbisyo ng mga online store.
Sinabi ni Banac na karaniwang inirereklamo ng mga namimili sa online na mali ang produktong idineliver sa mga ito na karamihan ay pekeng mga items.
Samantalang nagkakaroon din umano ng mga bigong transaksyon kahit na nakabayad na ang mga kostumer sa kanilang mga inorder online.
Ayon kay Banac, kung oorder sa online ay tiyaking lehitimo ang mga online stores na subok na ang husay ng serbisyo, kilala at maraming magagandang komento sa mga ibinebentang produkto.
Inihayag ng opisyal na hindi rin dapat magpadala sa buyo ng ilang post sa social media at kung maari ay cash on delivery ang piliin sa transaksyon upang kapag may aberya ay maibalik agad ang produkto.
Pinaiiwasan din ni Banac ang pagbibigay ng buo at mga personal na detalye upang hindi mabiktima ng mga kawatan.
Idinagdag pa ni Banac na sakaling mabiktima ay bukas ang PNP Anti-Cybercrime Group para tumulong sa sinuman.
- Latest
