Obrero hulog mula sa 16th floor, lasog
MANILA, Philippines — Lasug-lasog ang katawan ng isang steel man nang mahulog sa ika-16 na palapag na gusali sa Barangay San Lorenzo, Makati City kahapon ng umaga.
Idineklarang dead-on-arrival sa Makati Medical Center ang biktimang si Allan Casul 28, at residente ng Peñafrancia, Antipolo City makaraang magtamo ng matinding pinsala sa ulo at sa iba’t ibang bahagi ng katawan.
Base sa isinumiteng report ni P/Col. Rogelio Simon, hepe ng Makati City Police dakong alas-11:00 ng umaga nang maganap ang insidente sa 16th floor sheerwall BPO Building Processing Office 1 na matatagpuan sa Edsa corner Ayala Avenue Barangay Lorenzo, Makati City.
Tumuntong ang biktima sa isang plastic board subalit bumigay hanggang sa dumausdos pababa at bumagsak sa ground floor ng nasabing gusali.
Sinasabing marupok na ang pinagtungtungan na plastic board ng biktima kaya posibleng bumigay ito.
Sa ngayon ay patuloy pa ring nagsasagawa ng masusing imbestigasyon ang mga awtoridad hinggil sa naganap na insidente.
- Latest