Isko sa nagba-vandalize: ‘Padidilaan ko sa inyo ‘yan!’
MANILA, Philippines – Padidilaan ko sa inyo ‘yan!
Ito ang banta ni Manila Mayor Isko Moreno sa sinumang nagbabandalismo sa lungsod.
Ayon kay Moreno, lantarang pambabastos at pananabotahe ang ginagawang pagdudumi at pagsusulat ng ilang indibidwal sa mga pagmamay-ari ng pamahalaan.
Idinagdag pa nito na ginagawa ng city government ang lahat upang ayusin at linisin ang lungsod subalit may mga indibidwal na pasaway.
Agad namang umaksyon ang pamahalaang lokal ng Maynila para muling maayos ang ilang bahagi ng Lagusnilad underpass.
Ilang tauhan ng Department of Engineering and Public Works (DEPW) at Department of Public Services ang muling nagpintura para takpan ang mga bandalismo sa lugar.
Makikita sa isang pader sa underpass ang kulay pulang pintura at sulat na “PRESYO, IBABA! SAHOD, ITAAS! – PS,” “DIGMAANG BAYAN SAGOT SA MARTIAL LAW – PS” at “ATIN ANG PINAS! US-CHINA LAYAS! – PS.”
Ikinalungkot naman ni Manila Tourism and Cultural Affairs Bureau Director Charlie Dungo ang paglalagay ng bandalismo sa nilinis at pinaghirapang ayusin na underpass.
- Latest