368 pulis idineploy sa Bilibid
MANILA, Philippines — Pinamunuan kahapon ni NCRPO acting Director PBrigGen Debold Sinas ang ‘send-off ceremony’ sa 368 tauhan ng Regional Mobile Force Battalion para magbantay partikular sa Maximum Security Compound ng New Bilibid Prisons (NBP).
Matatandaan na nasa 400 tauhan ng RMFB ang pinull-out ni Sinas buhat sa pagbabantay sa mga istasyon ng Light Rail Transit at Metro Rail Transit dahil sa hindi umano trabaho ng mga naturang pulis ang pagbabantay sa mga train stations.
Upang hindi na maulit ang insidente ng pagpupus-lit ng dalawang pulis ng alak at tabako habang nasa 14 pa ang inimbestigahan dahil sa pagbibitbit ng cellular phones, mahigpit ang tagubilin ni Sinas sa mga panuntunan sa pagbabantay sa bilangguan.
Kabilang dito ang hindi pagdadala ng anumang cellphone o iba pang gadgets habang nakatalaga sa NBP, pagsusuot ng tamang uniporme, accounting ng mga tauhan bago ang deployment, at operational shifting sa pagitan ng alas-6:00 ng umaga at alas-6:00 ng gabi.
Mapapasailalim ang mga tauhan ng RMFB sa superbisyon ng Bureau of Corrections sa loob ng NBP at inaasahan ang pagsunod ng mga pulis sa polisiya nito. Inatasan din ang mga pulis na huwag bumuo ng komunikasyon sa mga bilanggo kung hindi kinakailangan.
“Sana gumanda ang ating trabaho upang gumanda ang tingin nila sa atin,” bilin ni Sinas sa mga pulis.
- Latest
