Rollback muli sa petrolyo
MANILA, Philippines — Patuloy ang pagbaba ng presyo ng petrolyo sa lokal na merkado dahil sa inaasahang pagpapatupad ng rollback sa ikatlong susunod na linggo ng mga kompanya ng langis sa bansa simula ngayong paparating na linggo.
Sa anunsyo ng Petron Corporation nitong Sabado, tinatayang bababa ang presyo ng gasolina ng maliit na P.10 sentimos kada litro, P.25 sentimos kada litro naman sa diesel at P.10 sentimos sa kada litro ng kerosene.
Ayon sa Petron, ito ay bunga pa rin ng paggalaw sa presyo ng krudo sa internasyunal na merkado. Karaniwang nagbababa ng presyo ng produkto ang Petron tuwing Martes ng umaga.
Sa pagtataya naman ng Unioil Corporation, nasa P.10-P.15 sentimos ang maaaring ibaba ng gasolina, P.25-P.30 sentimos sa diesel.
Sa kabila ng mga maliliit na rollback, mas mataas pa rin ang presyo ng petrolyo ngayong 2019 kumpara noong 2018. Mula Enero, nasa P5.61 na ang itinaas ng kada litro ng gasolina, P.4.02 sa diesel at P.96 sa kerosene.
- Latest
