Mister na ‘tulak’ ng droga, itinumba
MANILA, Philippines – Patay ang isang mister na sinasabing ‘tulak’ ng droga matapos na siya ay pagbabarilin ng hindi pa nakikilalang suspek sa Quezon City, kahapon ng madaling araw.
Ang biktima ay nakilalang si Boy Dela Rosa, 40, ng Brgy. Poblacion, Antipolo City.
Batay sa inisyal na imbestigasyon ni P/Cpl. Christian Loyola, naganap ang insidente dakong alas-3:30 ng madaling araw sa may BMA St., corner Kitanlad St., Brgy. Tatalon, Quezon City.
Sa pahayag ng nakasaksing tricycle driver, nag-aabang umano siya ng pasahero ng makarinig siya ng sunud-sunod na putok ng baril at nang kaniyang tingnan kung saan nanggaling ang putok ay nakita niyang duguang nakabulagta ang biktima.
Nakuha sa biktima ang isang plastic sachet ng shabu kaya ang hinala ng pulisya ay onsehan sa droga ang dahilan kung bakit itinumba ang biktima.
Gayunman, nagsasagawa pa ng masusing imbestigasyon ang pulisya upang mabatid ang tunay na motibo ng krimen.
- Latest