Nagpuslit ng baboy sa ASF infected area, kinasuhan na - Joy Belmonte
MANILA, Philippines – Kinasuhan na ng pamahalaang lungsod ng Quezon ang hog raiser sa Brgy. Payatas na nagpuslit ng alagang baboy na hinihinalang may African Swine Fever (ASF) at kinatay para ibenta sa Brgy. Bahay Toro sa lungsod.
Ito ang sinabi ni Quezon City Mayor Joy Belmonte nang iulat sa kanya ng QC Veterinary Department na nagsagawa ng raid sa isang bahay sa Bahay Toro makaraang makatanggap ng sumbong na may kinatay na baboy sa lugar na mula sa Payatas.
Hindi pinangalanan ni Belmonte ang kinasuhan pero ito anya ay paglabag sa Food Safety Act at sa Sanitation Code of the Philippines.
“Kinasuhan na po namin ang isang tao na nahuli na nagtakas ng kanyang baboy na alam naming infected at dinala sa isang barangay sa unang distrito, Brgy. Bahay Toro, para ibenta,”pahayag ni Belmonte.
Patuloy naman ang pagpapatupad ng QC 1-7-10 protocol ng Bureau of Animal Industry upang maiwasang kumalat pa sa ibang lugar ang sakit sa mga alagaing hayop.
Sa ilalim ng protocol, may mga naitalagang quarantine checkpoints sa may 1-kilometer radius mula sa babuyan at nagsasagawa naman ng surveillance at paglilipat ng mga baboy sa loob ng 7-kilometer radius mula sa infected areas at ang mga nasa loob ng 10-kilometer radius ay kailangang iulat ang anumang napapansing kakaiba sa mga alagaing baboy.
Sinabi ni Belmonte na sa ngayon ay cleared na sa ASF ang Brgys. Tatalon, Tandang Sora at Pasong Tamo at inaasahang ma-cleared na rin ang Barangay Bagong Silangan sa ASF. Patuloy naman anya ang ginagawang kampanya ng lolal na pamahalaan bago tuluyang ma-clear sa ASF ang Payatas.
Hanggang noong Oktubre 7, may kabuuang 3,065 baboy na ang napatay sa Payatas at may mahigit 2,000 pa ang inaasahang papatayin sa pamamagitan ng culling sa mga susunod na araw.
- Latest