49,000 bata sa Makati babakunahan ng anti-polio

MANILA, Philippines – Target ng Pamahalaang Lungsod ng Makati na mabig­yan ng ‘anti-polio vaccine’ ang nasa 49,000 mga bata sa lungsod bago sumapit ang Oktubre 27.

Sa datos ng Makati Health Department (MHD), nasa 13,000 mga bata na ang inisyal nilang nabakunahan mula pa nitong Oktubre 14 kasabay ng “Sabayang Patak Kontra Polio” mass vaccination program ng Department of Health.
Inatasan umano sila ni Mayor Abby Binay na mabigyan ang nasa 49,000 kabuuang mga bata ng bakuna kontra “polio virus”.

Nabatid na bukod sa pagbakuna sa mga health centers at mga pagamutan, nagbabahay-bahay din ang mga tauhan ng Health Department para matiyak na walang maiiwan na mga bata na hindi mapabakunahan.

Ibinibigay ang bakuna sa mga sanggol na kasisilang pa lang hanggang paslit na may edad 59 buwan na siyang nakikitang pinakalantad sa pagkakasakit ng polio. “I encourage Makatizens and the barangays to clean their surroundings. There is no cure for polio but it can be prevented by immunization and by maintaining a clean environment. Community involvement is very important,” paalala ni Binay sa mga residente.

Bukod sa unang dosage ng polio vaccine, may ikalawa at ikatlo pa itong dose na tiniyak ng mga manggagamot na ligtas at epektibo sa mga bata.