Higit 500 dayuhan, timbog sa investment scam
MANILA,Philippines — Mahigit sa 500 illegal foreign nationals na sangkot sa investment scam ang inaresto ng pinagsanib na puwersa ng National Capital Region Police Office (NCRPO) at Bureau of Immigration (BI) sa isinagawang operasyon kahapon sa Parañaque City.
Ang sinalakay ay ang Golden Unicorn Technology Inc. sa Millenium Building sa nabanggit na lungsoid.
Ayon sa ulat ng NCRPO, 418 sa mga dinakip ay pawang mga Chinese, kasama ang may 44 na Myanmar nationals, 26 na Malaysians, 19 na Vietnamese, apat na Taiwanese at Indonesian.
Ayon kay NCRPO director Guillermo Eleazar na nakatanggap ng ulat ang Pilipinas sa pamamagitan ng China na nagsasabing ang Golden Unicorn company ay sangkot sa telecommunications fraud sa China.
Bago isagawa ang operasyon ay isinailalim muna sa surveillance ang naturang lugar at lumabas na positibo ang natanggap na ulat.
Nabatid na ang mga dayuhan ay sangkot sa foreign version ng ‘budol-budol’ scam kung saan tinatarget nila ang kanilang bibiktimahin sa kanilang desktop computers.
“Kumukuha sila ng impormasyon sa pamamagitan ng phising na gagamitin nila sa isasagawa pang criminal activities”, pahayag ni Eleazar.
Kasalukuyang nasa kustodya ng Regional Special Operations Unit ng NCRPO ang mga dinakip na dayuhan.
- Latest
