Integridad sa print media nananatili -- Isko
MANILA, Philippines – Naniniwala si Manila Mayor Isko Moreno na nananatili ang integridad ng print media sa kabila ng malawak na makabagong teknolohiya at social media.
Sa kanyang pagdalo sa Print Media Congress 2019 ng United Print Media Group na ginanap sa Manila Hotel, sinabi ni Moreno na iba pa rin ang print media dahil sa nilalaman nitong balita at impormasyon.
Ayon kay Moreno, sa print media sinasala ang bawat balita bago ito ilathala at mabasa ng publiko.
Aniya pinananatili ng print media ang kredibilidad at pagkakapantay-pantay sa larangan ng pamamahayag.
Sinabi naman ni Jay Sarmiento, Vice President ng UPMG, iba ang pagsasanay ng journalism kumpara sa online. Aniya beripikado at may source ang balita at impormasyon bago ito ipalabas.
Mas reliable pa rin ang print dahil pinananatili ang pagiging patas sa bawat pagkuha ng bawat panig.
Binigyan diin naman ni Barbie Atienza, pangulo ng UPMG na dapat pairalin ang integridad sa print media at hindi dapat na makompromiso sa kabila ng kompetisyon at pagbabago.
Nagpasalamat naman si Moreno sa print media sa paglalathala ng mga proyekto ng Maynila. Ani Moreno, malaki man o maliit ang artikulo, malaking tulong ito sa lungsod upang malaman ng Manilenyo na may ginagawa ang pamahalaan.
Umaasa si Moreno na mas dadami at lalawak ang nasabing organisasyon upang manatili ang print media tulad na rin ng nakasanayan ng mga Filipino.
- Latest
