Manila North Cemetery dinisenyuhan ng bulaklak
300 artist lumahok
MANILA, Philippines — Bilang bahagi na rin ng paghahanda sa Undas, nagsama-sama ang may 300 paint artists para disenyuhan ang kahabaan ng Manila North Cemetery sa A. Bonifacio Ave., Maynila.
Alas-7:00 ng umaga kahapon nang simulan ng mga pintor ang kani-kanilang disenyong bulaklak sa may 500 metro na mural project.
Pinalutang ng mga paint artist ang mga bulaklak na sunflower, chrysantemum, rose, orchids at tulips.
Ayon kay Manila 3rd District Congressman Yul Servo Nieto, ang mural na tinawag na ‘Flores Para Los Muertos’ o Flowers for Departed ay para sa mga nakalibing sa sementeryo na hindi na nadadalaw at nadadalhan ng bulaklak ng kanilang mga mahal sa buhay.
Ani Servo, ito man lang ay pagbibigay respeto sa mga kaluluwa ng mga namayapa sa nalalapit na Todos Los Santos.
Nabatid kay Nieto na matagal na niyang proyekto ito sa Maynila subalit ngayon lamang naisakatuparan sa pakikipagtulungan ng Pinto Art Museum at Davies Paint.
- Latest