Sub-leader ng Abu Sayyaf, timbog
MANILA, Philippines — Nasakote ng mga operatiba ng pulisya ang isang sub-leader ng mga teroristang Abu Sayyaf Group (ASG) sa isinagawang operasyon sa Quezon City nitong nakalipas na linggo, ayon sa mga opisyal kahapon.
Sa press briefing, iprinisinta nina Quezon City Acting Police Director Police Colonel Ronnie Montejo at National Capital Region Police Office (NCRPO ) Director Police Major Gen. Guillermo Eleazar ang nasakoteng suspect na si Ibrahim Lambog Mullo, 26.
Nakumpiskahan din ito ng isang cal. 45 pistol at sling bag na naglalaman ng fragmentation grenade. Si Mullo ay nagtago sa pangalang Abimar Agi Ahaja upang ikubli ang tunay nitong pagkatao.
Sinabi ng opisyal na si Mullo ay kabilang sa tatlong miyembro ng mga teroristang Abu Sayyaf Group(ASG) na isinasailalim sa surveillance operation sa Metro Manila kung saan ang dalawang iba pa ay nasakote na noong Hulyo ng taon.
Hindi na nakapalag ang suspect matapos mapalibutan ng nag-operate na mga pulis.
Ikinatwiran naman ng suspect na nagtungo siya sa Quezon City upang asikasuhin ang kaniyang asawa na nanganak kamakailan at sinabing nagtratrabaho na umano siya ng normal sa construction firm sa San Miguel, Bulacan na pag-aari ng tiyuhin ng kaniyang misis na ang housing project ay para sa Army Scout Rangers sa Kamias at Calumpang, Bulacan.
Base pa sa impormasyon sa intelligence network, si Mullo ay na-recruit ng Abu Sayyaf Sub Group (Ajang-Ajang) na nakabase sa Sulu sa pamamagitan ng social media ni ASG sub-leader alyas Commander Pading noong 2017 kung saan sumapi ito sa mga bandido sa pangakong tatanggap siya ng P 10,000 buwanang allowance.
Si Mullo ay tinukoy na isa rin umano sa mga suicide bombers sa Indanan, Sulu na kasamahan nina Norman Lasuca at isang alyas Mujir. Inamin ni Mullo na noong 2018 ay napagkasunduan nilang mag-asawa na magtungo sa Metro Manila para maghanap ng trabaho at mamuhay ng normal.
- Latest