Senior citizen, isang linggong libre sa MRT-3

MANILA, Philippines – Inihayag ng pamunuan ng Metro Rail Transit Line 3 (MRT-3) na simula kahapon ay nagkaloob sila ng isang linggong libreng sakay sa mga matatanda o senior citizen.

Ito’y bilang pakikiisa sa taunang selebrasyon ng Elderly Filipino Week.

Sa abiso ng MRT-3 at  Department of Transportation (DOTr), ang libreng sakay ay sinimulang ipatupad mula alas-5:00 ng madaling araw kahapon, Oktubre 1, at magtatagal hanggang alas-10:30 ng gabi ng Oktubre 7, Lunes.

Ayon sa MRT-3-DOTr, kinakailangan lamang ng pasahero na magprisinta ng Senior Citizen ID o kahit na anong Identification Card na magpapatunay na siya ay 60-taong gulang pataas na upang maka-avail ang libreng sakay.

Ang MRT-3 ay bumibiyahe sa kahabaan ng Epifanio delos Santos Avenue (EDSA), mula Taft Avenue, Pasay City hanggang North Avenue, Quezon City at vice versa.