5 patay na baboy, itinapon sa creek

MANILA, Philippines – Limang patay na baboy ang itinapon at natagpuang palutang-lutang sa isang creek sa Quezon City, kahapon ng hapon.

Ayon sa mga awtoridad, posibleng inanod sa creek ang mga naturang baboy na nadiskubre pasado alas-2:00 ng hapon sa Lingayen St., Area 5, Sitio Veterans, Brgy. Bagong Silangan, Quezon City.

Umaalingasaw na umano ang masangsang na amoy sa lugar at pangamba ng mga residente, posibleng magdulot ng sakit ang mga patay na baboy, na hinala nila ay dinapuan ng African Swine Flu.

Kaagad namang kinuha ng mga tauhan ng Bureau of Animal Industry (BAI) ang mga patay na baboy upang masuri ang mga ito at matukoy kung ano ang posibleng ikinamatay nila.

Sinasabing mayroong mahigit na 100 hog raisers sa Quezon City, ngunit hindi pa matukoy kung sila ang nagtapon ng mga patay na baboy.