3,810 toneladang basura nahakot sa Manila Bay
MANILA, Philippines — Tinatayang nasa 3,810 tonelada ng basura, water hyacinth, at putik o burak ang nahakot mula sa baybayin ng Manila Bay at mga estero sa Kamaynilaan ng Metro Manila Development Authority (MMDA) mula nang ilunsad ang paglilinis sa mga ito nitong 2019.
Sa ulat ng Manila Bay Rehabilitation, mula Enero 7 hanggang Agosto 31, ay 749.72 tonelada ang nakolektang basura sa baybayin ng Manila Bay at mga kalapit na lugar; 737.12 tonelada naman ng basura at water hyacinth ang nahakot mula sa aplaya ng Baseco Compound sa Tondo.
Sa Pasig at San Juan rivers, nakahakot naman ng 901.85 toneladang basura, habang 1,422.17 tonelada naman ng burak ang nakuha mula sa mga estero at drainage na dumadaloy papunta sa Manila Bay.
Sinabi naman ni MMDA chairman Danilo Lim na inaasahan pa nila ang pagdami ng mga basura sa Manila Bay sa mga susunod na buwan bunsod umano ng tag-ulan at masamang panahon.
“Dumadami ang basura sa Manila Bay tuwing pagkatapos ng malakas na ulan, pero patuloy ang rehabilitasyon ng Manila Bay,” sabi pa ni Lim.
- Latest
