Bebot kinatay sa hotel
MANILA, Philippines — Nasawi ang isang ‘di pa nakikilalang babae na sinasabing nagpapabayad para sa panandaliang aliw nang ataduhin ng saksak ng pinaniniwalaang kustomer nito naganap sa loob ng isang hotel, sa Tondo, Maynila, kahapon ng madaling araw.
Hindi na umabot pang buhay sa Gat Andres Bonifacio Memorial Medical Center (GABMMC) ang biktimang inilarawan sa edad na 25-30, na nag-check-in sa Room 505 ng Safety Motel na matatagpuan sa panulukan ng Mabuhay at Moriones St. sa Road 10, Tondo, Maynila.
Pinaghahanap naman ang suspek na kasamang nag-check-in ng biktima na inilarawang nakasuot ng sumbrero, nasa 5’2-5’3 ang taas, katamtaman ang laki ng katawan.
Sa ulat ni P/Master Sergeant Charles John Duran kay Manila Police District-Homicide Section chief, P/Captain Henry Navarro, dakong alas-5:35 ng madaling araw nang pumasok umano sa nasabing hotel ang dalawa.
Sa imbestigasyon, sinabi ng ilang hotel staff na may limang minuto pa lamang sa loob ng nasabing silid ang dalawa nang makitang lumabas ang duguang biktima na naghahabol ng hininga.
Madalas umanong makita ng mga empleyado ng hotel ang babaeng biktima dahil suki ito doon na diumano’y may iba-ibang lalaking kasama.
Pinag-aaralan ng mga otoridad ang nakalap na kuha ng closed circuit television (CCTV) para sa ikadarakip ng suspek.
- Latest
