Inspector sa Assessor’s Office ng Taguig, huli sa kotong
MANILA, Philippines — Timbog ang isang inspector sa Assessor’s Office ng Taguig City nang tangkaing kotongan umano ang isang retiradong heneral na nag-aaplay ng permit sa kanyang negosyo, kamakalawa ng gabi sa naturang lungsod.
Kinilala ang inaresto na si John Paul Mabilin, 32, ng Brgy. Calzada Tipas, ng naturang lungsod.
Positibo siyang itinuro ng biktimang si retired Police Gen. Jonathan Ablang, ng Phase 6 AFPOVAI Fort Bonifacio, ng naturang lungsod.
Sa ulat ng Taguig City Police, unang lumapit sa tanggapan ng intelligence section si Ablang at inireklamo si Mabilin na nanghihingi umano ng pera para maipalabas ang mga inaplayang permit para sa kanyang negosyo.
Dito nagkasa ng entrapment operation ang pulisya dakong alas-4:50 ng hapon sa loob ng isang fastfood chain sa may C5 Service Road sa Brgy. Ususan, ng naturang lungsod.
Inaresto ng mga pulis si Mabilin nang tanggapin niya ang marked money buhat kay Ablang kabilang ang dalawang piraso ng P1,000 bill at dalawang piraso ng P500 bill na minarkahan ng flourescent powder ng pulisya.
- Latest
