5 timbog sa pagbebenta ng mga bala
MANILA, Philippines — Timbog ng mga tauhan ng Caloocan City Police ang limang lalaki kabilang ang isang inhinyero na sangkot sa pagsusuplay ng bala sa mga elementong kriminal sa ikinasang entrapment operation, kamakalawa ng gabi.
Nakilala ang mga nadakip na sina Crispin Vizmanos, 59, Civil Engineer; George Morales, 44, vendor; Rannie Valverde, 36; Edwin Espera, 41; at Karen John Montalban, 34.
Sa ulat ng pulisya, alas-8 ng gabi nang ikasa ang operasyon sa may Interior 10 A. Mabini Street, Brgy. 33, Maypajo. Isang tauhan ng pulisya ang nakipagkasundo sa mga suspek na bumili ng bala ng kalibre .45 baril at nagkasundo na magkikita sa nabanggit na lugar.
Matagumpay na nakabili ang poseur buyer ng 20 piraso ng bala para sa kalibre .45 baril kapalit ng P400 marked money. Dito na sumulpot ang ibang mga pulis na nakaantabay sa lugar at nasakote ang limang suspek.
Nakumpiska kay Morales ang 20 piraso ng bala ng kalibre .45 baril at pitong maliliit na plastic sachet ng shabu na may street value na P50,000. Tigda-dalawang pakete ng shabu naman ang nakumpiska sa posesyon nina Vizmanos, Valverde, Espera at Montalban.
Nakaditine ngayon sa Caloocan City Police Detention Center ang mga suspek na nahaharap sa kasong paglabag sa Comprehensive Dangerous Drugs Act of 2002 habang dinala sa PNP Crime Laboratory ang mga nakumpiskang ebidensya.
- Latest
