Nationwide tigil-pasada, ikinakasa
Protesta vs Puj Modernization
MANILA, Philippines — Nagbanta ang grupong Alliance of Concerned Transport Organizations (ACTO) ng malawakang at malakihang tigil pasada sa buong bansa sa oras na ituloy ng Land Transportation Franchising and Regulatory Board (LTFRB) ang pag-phaseout sa mga pampasaherong jeep sa bansa sa ilalim ng PUJ modernization program ng pamahalaan.
Ito ay sinabi ni Efren de Luna, Pangulo ng ACTO nang lusubin kahapon ng mga driver at operator ng ACTO at Pagkakaisa ng mga Samahan ng Tsuper at Opereytor Nationwide (Piston) ang LTFRB main office sa East Avenue sa Quezon City para iparinig sa mga opisyal ng ahensiya ang kanilang mga sentimiyento laban sa PUJ phaseout.
“Kung hindi papanigan ng LTFRB ang aming panawagan, magkakaroon kami ng ikalawang protesta na mas magiging all-out, nationwide transport strike,” sabi ni de Luna.
Kaugnay nito, sinabi ni George San Mateo, National President ng PISTON na ang kanilang pagkilos ay bilang pagkondena sa jeepney modernization at taas ng presyo ng petroleum products.
Anya, isang panlilinlang at misrepresentation ang ipinatutupad na PUJ modernization program ng pamahalaan.
Ilan anya sa tinututulan ng kanilang hanay ay ang requirement ng LTFRB na dapat ay may terminal ang isang operator na may 200 units, gayundin ang itinakdang deadline ngayong taon lamang para makabili ng bagong sasakyan na hindi kakayanin ng kanilang hanay.
Noong 2017 inilunsad ng LTFRB ang PUJ modernization program na layong mapalitan na ang mga luma na, kakarag-karag na pampasaherong jeep sa bansa o mga jeep na may edad 15 taon at higit pa.
Patuloy namang pinararating ng mga jeepney operators na hindi sila tutol sa jeepney modernization ng gobyerno pero may ilang mga patakaran ang LTFRB na naitakda rito na mahirap nilang tupdin, tulad ng ang lahat ng pampasaherong jeep ay dapat pawang Euro 4 compliant at gamit ang renewable energy.
Sa ngayon, karamihan sa mga pampasaherong jeep sa bansa ay kinakargahan ng diesel.
- Latest
