Brgy. exec. officer itinumba
MANILA, Philippines — Binaril at napatay ang isang 45 -anyos na barangay executive officer ng hindi pa nakikilalang lalaki habang nakaupo sa harapan ng kaniyang motorcycle repair shop sa Binondo, Maynila, kamakalawa ng hapon.
Binawian ng buhay sanhi ng tinamong tama ng bala ng baril sa ulo habang nilalapatan ng lunas sa Gat Andres Bonifacio Memorial Medical Center (GABMMC) ang biktimang si Dario Habal, negosyante at ex-o sa Brgy. 275, Zone 25 ng Area B, Parola Compound, bahagi ng Binondo.
Nangangalap pa ng ebidensiya at kuha ng closed circuit television (CCTV) ang mga awtoridad para matukoy ang pagkakakilanlan sa gunman na inilarawang nasa 37 hanggang 39-anyos , 5’7 ang taas, nakasuot ng kulay puting t-shirt, maong na pantalon.
Sa ulat ni P/Master Sergeant Bernardo Cayabyab ng Manila Police District-Homicide Section, dakong alas-4:00 ng hapon nang maganap ang insidente ng pamamaril sa harap mismo ng repair shop ng biktima nang biglang lumutang ang gunman at pinaputukan ito ng malapitan sa ulo gamit ang kalibre 9mm na baril.
Nang humandusay ang biktima ay naglakad lamang papalayo ang suspek habang agad na dinala sa pagamutan ang biktima pero hindi na rin naisalba ang buhay nito. (with trainee Keanna Tiatco)
- Latest
