Karnap na sasakyan nasamsam sa kuta ng sindikato
MANILA, Philippines — Apat na behikulo na pinaniniwalaang mga karnap ang narekober ng mga tauhan ng Caloocan City Police Station sa ginawang pagsalakay sa hinihinalang kuta ng mga karnaper kung saan dalawang suspek ang nadakip, kamakalawa ng hapon sa naturang lungsod.
Nakilala ang mga nadakip na sina Leovy Orfila, 44 at Armando Igayan, 51, habang pinaghahanap pa ang mga kasabwat na sina Ronald Alejo at dalawa pang inaalam ang pagkakakilanlan.
Sa ulat ng Caloocan City Police, alas-2:45 ng hapon nang salakayin ng mga tauhan ng Anti-Carnapping Unit at Task Force Limbas ng Highway Patrol Group ang kuta ng sindikato sa loob ng Santa Fe Homes Site sa Brgy. 167.
Armado ang mga pulis ng arrest warrant na inisyu ng Quezon City Metropolitan Trial Court branch 35 laban sa suspek na si Orfila para sa kasong paglabag sa RA 10591 o Illegal Possession of Firearms and Ammunitions.
Dito inabutan ng mga pulis ang suspek na si Igayan na abala sa pag-tamper, pagpapalit ng kulay at pag-kahoy sa makina at chassis ng isang behikulo dahilan ng kanyang pagkakadakip.
Narekober ng mga pulis ang isang unit ng puting Toyota Hi-Ace (XBU 239), isang unit ng Toyota Grandia na may pekeng plaka na ABE 2771, isang unit ng brown na Honda CRV (PRO 859), isang unit ng magenta Mio Sporty scooter (NC 71625), iba’t ibang uri ng plaka, isang spray gun, isang compressor at isang container ng puting pintura.
Isang granada rin ang nadiskubre sa posesyon ng suspek na si Orfila habang nabatid na si Armando Igayan ay siya ring si Armando Dela Cruz na nahaharap rin sa isang kasong kriminal sa korte ngunit gumamit ng ibang pangalan.
- Latest
