Dagdag-bawas sa presyo ng petrolyo
MANILA, Philippines — Magpapatupad ng pagtaas sa presyo ng gasolina habang magbabawas naman sa diesel at kerosene ang mga kompanya ng langis sa bansa ngayong araw ng Martes.
Dakong alas-6:00 ngayong umaga ipatutupad ng Pilipinas Shell, PTT Philippines at Petron Corporation ang dagdag na P 0.25 sentimos sa kada litro ng kanilang gasolina, habang may bawas presyo naman na P0.35 sentimos sa kada litro ng kanilang kerosene at P0.40 sentimos naman sa kada litro sa diesel.
Unang nang nagpatupad ang Phoenix Petroluem ng pagtapyas ng P0.40 kada litro sa diesel nitong nakaraang Sabado ng alas-12:00 ng tanghali.
Ayon sa Department of Energy (DOE), ang dahilan ng nasabing pagalaw ng presyo ng produktong petrolyo ay bunsod ng panibagong presyuhan sa pandaigdigang merkado dahil sa planong pagbabawas ng produksyon ng mga oil exporting and producing countries (OPEC) sa kanilang crude oil.
Apektado rin ang presyo sa internasyunal na merkado sa nagaganap na sigalot sa pagitan ng Estados Unidos at Iran, pagbaba sa demand ng krudo at paglakas sa presyo ng Philippine peso.
- Latest
