3 sugatan sa karera ng motor
MANILA, Philippines — Malubhang nasugatan ang tatlong lalaki nang pare-parehong sumemplang ang sinasakyan nilang motorsiklo habang nagkakarerahan kahapon ng madaling araw sa Caloocan City.
Nakaratay ngayon sa Dr. Jose N. Rodriguez Memorial Medical Center ang mga sugatan na sina Dranred Tiongson, 23 at Kenneth Laum, 28, kapwa nakatira sa Brgy. 176 Bagong Silang, ng naturang lungsod. Isa pang lalaki na angkas ni Tiongson ang sugatan din sa naturang pagsemplang.
Sa ulat ng pulisya, naganap ang insidente dakong ala-1:00 ng madaling araw sa kahabaan ng Langit Rd sa Phase 5 Brgy. 176 Bagong Silang sa tapat ng isang videoke bar.
Nabatid na binabaybay ng isang Yamaha Mio na minamaneho ni Tiongson at isang Suzuki Raider na gamit naman ni Laum ang naturang kalsada patungong Tala nang magkarerahan ang dalawa.
Pagsapit sa tapat ng isang videoke bar, nagkasagian ang dalawang motorsiklo dahilan para sumemplang at tumilapon sa kalsada ang mga sakay nito.
Sinaklolohan ng mga tauhan ng barangay ang mga sugatang biktima at naisugod sa nabanggit na pagamutan kaya agad na nalapatan ng lunas.
- Latest