East Zone, makakaranas ng 8-12 oras na rotational water interruption
MANILA, Philippines — Pag-iimbak ng tubig ang kailangang paghandaan na ng mga residente na nakatira sa East Zone area na sineserbisyuhan ng Manila Water sa Metro Manila.
Ito ayon kay Jeric Sevilla Jr., Group Head, Corporate Strategic Affairs and Head, Corporate Communications ng Manila Water ay dahil magpapatupad sila ng bagong scheme para sa rotational water service interruption para sa lahat ng nasa East Zone mula 8 hanggang 12 oras sa gabi.
Sinabi ni Sevilla na ang hakbang ng Manila Water ay bunsod ng pahayag ng National Water Resources Board na ibababa nito ang alokasyon sa mga concessionaires mula sa kasalukuyang 46 cubic meters per second (CMS) ay gagawin itong 40 CMS bilang paghahanda sa low-level outlet (LLO) dahil sa pagbaba ng water level sa Angat Dam na malapit ng umabot sa critical level na 160-meters.
Ang bagay na ito ayon kay Sevilla ay maaapektuhan ang suplay ng tubig patungo sa kanilang treatment plants at mahihirapang makapag- refill sa kanilang reservoirs.
Bagamat wala pang takdang araw ng rotational water service interruption ang Manila Water ay nananawagan ang kompanya na maging handa ang lahat para makapag-imbak na ng tubig. Kahapon, umaabot sa 161.30 meters ang water level sa Angat dam, mas mababa sa 161.78 meters noong martes June 18.
- Latest