2 arestado sa pangongotong
Sa Valenzuela at Maynila
MANILA, Philippines — Swak sa selda ang dalawang lalaki dahil sa pangongotong sa magkahiwalay na insidente kamakalawa sa Valenzuela at Maynila.
Nahaharap ngayon sa mga kasong Usurpation of Authority, Falsification of Public Document, Robbery Extortion at Resistance and Disobedience ang suspek na kinilalang si Ramil Coronel, 41-anyos, matapos magpanggap na empleyado umano siya ng business permit office ng pamahalaang lungsod ng Valenzuela at tangkaing kotongan ang mga may-ari ng isang vulcanizing shop at isang tindahan, kamakalawa ng umaga sa naturang lungsod.
Inireklamo siya ng mga negosyanteng sina Jerry Tello, 44, at Josephine Lladoc, 43, kapwa nakatira sa Apolonia St., Brgy. Mapulang Lupa, ng naturang lungsod.
Sa ulat ng pulisya, hiningan umano ni Coronel si Lladoc ng P1,260 bilang multa dahil sa hindi pag-renew ng business permit ng kanyang vulcanizing shop habang si Tello ang P15,000 dahil sa hindi naman pagsunod umano sa “business sanitary permit” para sa kanyang tindahan at eatery sa naturang lugar.
Dahil sa hindi naniniwala sa pinagsasabi ng suspek, tumawag sa pulisya si Tello na nagresulta sa pag-aresto kay Coronel at pagkakakumpiska ng iba’t ibang dokumento at identification card ng iba-ibang lokal na pamahalaan na pawang mga peke.
Samantala, arestado rin at nahaharap sa kasong Carnapping at Robbery Extortion si Rolando Toquero, alyas “Roy”, 39, caretaker ng Manila Traffic and Parking Bureau (MTPB), nang tangkaing kotongan ang may-ari ng na-impound na trak, kamakalawa ng gabi.
Sa reklamo ng may-ari ngtrak na si Teodorico Gervacio matapos mahuli ang kanyang tsuper sa isang traffic violation at ma-impound ang trak ay hiningan siya umano ni Roy ng halagang P10,000 para mailabas ang trak hanggang sa magkaroon ng negosasyon at naibaba ito sa P8,500.
Dito humingi ng tulong si Gervacio sa NCRPO-RSOU na nagkasa ng entrapment operation dakong alas-8:15 ng gabi sa mismong compound ng MTPB na nagresulta sa pagkakadakip sa suspek.
- Latest
