Chinese drug trafficker, 3 pa tiklo sa P20-M shabu

MANILA, Philippines — Naaresto ng pinagsanib na pwersa  ng Philippine Drug Enforcement Agency (PDEA) at  National Capital Regional Office  ang  isang pinaghihinalaang Chinese drug trafficker at tatlong iba pa  kung saan nakumpiska sa kanila ang tatlong kilo ng shabu na nagkakahalaga ng P20 milyon  sa drug bust operation sa Valenzuela City kahapon.

Kinilala ang mga nasakote na sina Wu Lianlai, mga kasamahan nitong drug trafficker na sina Florencio Serdon, Sunbenny Marquez Jr. at Christopher dela Cruz.

Sa ulat na tinanggap ni PDEA Director Undersecretary Aaron Aquino, bandang alas-12:30 ng hapon nang magsagawa ng operasyon ang mga anti-drug operatives laban sa mga suspect sa  9 B , Cadena de Amor Street, Brgy. Maysan ng lungsod.

Hindi na nakapalag ang mga suspect matapos na makorner ng raiding team na pumalibot sa lugar.

Bago ito ay nakatanggap ng impormasyon ang PDEA hinggil sa kahina-hinalang aktibidades ng grupo ni Lianlai sa lugar kaya agad itong isinailalim sa masusing surveillance operations.

Kasalukuyan na ring inaalam kung anong sindikato ng  illegal na droga ang kinabibilangan ng mga suspek.

Nahaharap ngayon ang mga suspect sa kasong paglabag sa Section 5 at Section 11 ng Article II ng Republic Act 9165 o ang Anti Dangerous Drugs Act.