Exec. assistant ni Junjun Binay, tuluyan nang pumanaw
MANILA, Philippines — Tuluyan nang nasawi ang executive assistant ni dating Makati City Mayor Junjun Binay habang nilalapatan ito ng lunas sa isang ospital nitong Biyernes ng gabi sa Makati City.
Kinumpirma kahapon ni Junjun Binay sa pamamagitan ng kanyang official facebook, na binawian na nang buhay habang ginagamot sa Makati Medical Center (MMC) ang kanyang assistant na si Monaliza “Monette” Bernardo, 44 matapos itong pagbabarilin ng hindi pa nakikilalang gunman.
Tinamaan ito sa kanang kamay na lumusot sa tiyan kung saan nahagip ang kidney nito.
Nabatid na nag-alok ng halagang P1 milyong pabuya si dating Vice President Jejomar Binay para sa magtuturo at sa ikadarakip ng mga suspek.
Kinumpirma rin kahapon ng hepe ng Makati City Police na si Senior Supt. Rogelio Simon, alas-11:12 kamakalawa ng gabi ng bawian nang buhay si Bernardo.
Nabatid na Huwebes, alas-8:50 ng gabi binaril ng riding-in-tandem si Bernardo malapit sa kanilang bahay sa Makiling St., Brgy. Olympia ng nabanggit na lungsod, na kagagaling lang ng biktima sa trabaho at sa isang pulong.
Sa pahayag sa pulisya ng ilang mga nakasaksi, kitang nagmamanman ang dalawang suspek na lulan ng motorsiklo na walang plaka sa lugar bago mangyari ang pamamaril sa biktima.
Aniya patuloy pa rin silang nagsasagawa ng masusing imbestigasyon sa insidente at ini-isa isa nila yun mga nakausap-at nakahalubilo ng biktima bago ang ginawang pamamaslang dito.
- Latest