AWOL na pulis, arestado!

MANILA, Philippines — Inaresto ang isang AWOL(absent without official leave) na pulis ng kanyang mga kabaro sa loob ng headquarters ng Eastern Police District (EPD) sa Brgy.  Malinao, Pasig City, dahil sa pagtangay sa kanyang service na baril.

Kinilala ni EPD Director P/Chief Supt. Christopher Tambungan ang suspek na si dating PO3 Fernando Usita, 35, dating nakatalaga sa EPD headquarters at residente ng Brgy. Pinugay, Baras, Rizal.

Sa ulat ng EPD, dakong alas-12:00 ng tanghali nang arestuhin si Usita ng mga tauhan ng District Intelligence Unit, sa pangunguna ni P/Supt. Hendrix Mangaldan, sa bisa ng warrant of arrest na inisyu ni Hon. Judge Rolando De Guzman ng Pasig City Metropolitan Trial Court (MTC) Branch 72, dahil sa kasong malversation of government property bunsod ng pagkabigong isurender ang kanyang service firearm.

Namonitor umano ng mga pulis na inaayos ni Usita ang kanyang apela sa kinakaharap na kasong administratibo sa headquarters ng EPD kung saan doon siya inaresto.

Narekober naman ang service firearm ni Usita, na isang Glock na .9mm caliber pistol, na may isang magazine at mga bala, sa kanyang tahanan.

Nabatid na Hunyo 2018 nang magsimulang mag-AWOL si Usita dahil sa personal na kadahilanan kaya’t inirekomendang ma-demote siya ng isang ranggo ng District Discipline Law and Order Section.  Nobyembre 5, 2018 naman nang ilabas ng hukuman ang warrant of arrest laban sa suspek.