Mag-asawa balik selda sa droga
MANILA, Philippines — Balik-selda ang mag-asawa na una nang nakulong dahil sa pagtutulak ng droga matapos muling madakip ng mga awtoridad sa isinagawang buy-bust operation sa San Juan City kamakalawa ng gabi.
Ang mag-asawa ay kinilalang sina Luisito Pancho, 54, at Teresita Pancho, 53, kapwa residente ng Brgy. Batis, San Juan City.
Batay sa ulat ni San Juan City Police chief, P/Senior Supt. Ariel Fulo, dakong alas-10:00 ng gabi nang maaresto ng mga tauhan ng Station Drug Enforcement Unit (SDEU) sa pangunguna ni P/Senior Insp. Edwin Malabanan ang mag-asawa sa isang buy-bust operation sa naturang lugar.
Nakumpiska ng mga awtoridad mula sa mga suspek ang tatlong pakete ng shabu.
Batay sa rekord, ang mag-asawa ay dati nang nakulong sa San Juan City Police dahil sa drug charges noong 2017 at nakalalaya lamang matapos na payagan ng hukuman na makapaglagak ng piyansa na nagbalik sa kanilang ilegal na gawain.
- Latest
