Coliform level sa Manila Bay, patuloy sa pagbaba
MANILA, Philippines — Tuluy-tuloy pang bumababa ang fecal coliform level sa Manila Bay, kasunod ng rehabilitation efforts ng pamahalaan para maisalba ang dagat.
Sa isang presscon sa Maynila, inanunsyo ni DENR Secretary Roy Cimatu na nakatulong nang malaki ang pagpapasara sa ilang mga pribadong establisiyimento malapit sa Manila Bay, gayundin ang pagsasara ng Manila Zoo na nadiskubreng walang sariling sewage treatment plant kaya diretso sa estero ang dumi nito na tumutuloy naman sa Manila Bay.
Sa monitoring ng DENR hanggang noong isang linggo, malaki na ang naging improvement ng kalidad ng tubig sa dagat dahil sa mas mababang coliform content.
Pero binigyang diin ng kagawaran na hindi pa rin ito pasok sa standard na 100 Most Probable Number (MPN) para sa recreational activities gaya ng swimming at diving.
Sa pinakahuling laboratory analysis, sa area ng Padre Faura, ang dating 54-million MPN fecal coliform level ay bumaba na sa 8.3-million MPN.
Ang dating 1.33-billion Most Probable Number sa area ng Antonio de Abad ay nasa 130-Million MPN na lang.
Sa area ng Remedios, o sa tapat ng Aristocrat, ang dating 160-million MPN ay bumaba na sa 25.5-M MPN.
Kumpiyansa ang DENR na patuloy pang bababa ang coliform level sa Manila Bay sa pagpapatuloy ng rehabilitasyon ng dagat.
- Latest