Bantay ng pasyente sa ospital, dapat 1 lang-DOH
MANILA, Philippines — Isang bantay na lamang ang papayagan ng Department of Health (DOH) na magbabantay sa kanilang pasyente na naka-confine sa mga ospital na apektado ng water shortage.
Ang kautusan ay ginawa ni Health Secretary Francisco Duque bilang tugon sa kakulangan ng supply ng tubig sa mga ospital.
Sa kanyang ginawang press conference sa National Kidney Transplant Institute (NKTI), umaasa si Duque na maiintindihan siya ng pamilya at magulang ng mga naka-confine dahil kailangan na panatilihin ang kalinisan ng lugar.
Mahalaga ang tubig sa mga ospital tulad ng NKTI dahil kailangan nito ng 1,500 cubic meters ng tubig araw-araw para sa hemodialysis units at hospital operations.
Aniya kung papayagan ang tatlong bantay bawat pasyente mas makakadagdag pa umano ang mga ito sa problema.
Lumilitaw na ang limang ospital na sinusuplayan ng Manila Water ay NKTI, Rizal Medical Center, National Center for Mental Health, Philippine Children’s Medical Center at Quirino Memorial Medical Center.
- Latest