Jaywalking criminal offense na: Mahuhuli ilalagay sa alarm list ng NBI
MANILA, Philippines — Ilalagay na ng Metropolitan Development Authority (MMDA) sa alarm list ng National Bureau of Investigation (NBI) ang mga jaywalkers na hindi nagbabayad ng kaukulang multa.
Kasabay nito, ikokonsidera na ang jaywalking na isang criminal offense na may mabigat na parusa.
Ito ay matapos magkasundo ang mga alkalde ng Metro Manila para i-deputize ang MMDA sa pagpapatupad ng mga anti-jaywalking ordinances ng 17 local government units ng Metro Manila.
“Kami ay natutuwa na lahat ng LGU sa Metro Manila ay may ordinansa kontra jaywalking. Hiniling namin sa mga LGUs na i-deputize ang mga tauhan namin para mas palakasin ang mga local ordinances,” pahayag ni MMDA general manager Jojo Garcia matapos ang Metro Manila Council (MMC) meeting kahapon sa tanggapan ng MMDA.
Bilang mas mabigat na parusa, ang pangalan ng mga violators na bigong makapagbayad ng multa o makapag-community ser-vice ay ipo-forward sa NBI para maisama sa kanilang alarm list.
“Kung isasawalang bahala lang ng mahuhuling jaywalker ang kanilang citation ticket, maaari namin itong sampahan ng kaso sa paglabag sa lokal na ordinansa at isusumite namin ang kanyang pangalan sa NBI,” saad ni Garcia.
Pipirmahan muna ng mga Metro Manila mayors, na bumubuo sa MMC, ang governing at policy-making body ng MMDA, ang resolusyon bago ito maipatupad.
Sa kasalukuyan, ang MMDA ay may sariling anti-jaywalking policy kung saan iniisyuhan ng citation tickets na may multang P500 ang mga lalabag. Maaaring magbayad ng multa o mag-community service ang sinu-mang mahuhuli.
Samantala, ang mga lokal na pamahalaan naman ay may kanya-kanya ring anti-jaywalking ordinances na kanilang ipinapatupad sa kani-kanilang mga lugar.
- Latest