Shootout: 2 holdaper, utas
MANILA, Philippines — Todas ang dalawang holdaper matapos maki-pagpalitan ng putok sa mga pulis na humabol sa kanila sa Payatas Road, Quezon City, kahapon ng madaling araw.
Wala pang pagkaka-kilanlan ang mga suspek na nakuhanan ng dalawang kalibre .38 baril, isang motorsiklo at isang nakaw na bag na pag-aari ng kanilang hinoldap na babae na kinilalang si Maribel Fernandez, isang call center agent.
Ayon kay P/Supt. Joel Villanueva, hepe ng Batasan Police Station, dakong alas-2:15 ng madaling araw ay nakapuwesto ang kanyang mga tauhan sa Molave Street para sa checkpoint kaugnay ng election period nang mapadaan ang dalawang suspek.
Imbes na huminto, humarurot ang mga suspek kaya’t hinabol ng mga pulis, pero agad silang pinaputukan kaya nagkaroon ng ‘running gun battle.’
Nakorner ang dalawa sa may Lupang Pangako sa Payatas, pero sa halip na sumuko ay nakipagbarilan pa sa mga pulis na nagresulta ng kanilang agarang kamatayan.
Narekober din mula sa dalawang holdaper ang 14 na sachet ng ipinagbabawal na gamot.
Positibo ring kinilala ni Fernandez na ang dalawang napatay ay siyang nang-agaw sa kanyang bag, na nabawi ng pulisya at ang kanyang mga gamit.
- Latest