Gang ng mga preso sa Bilibid, binuwag
MANILA, Philippines — Nabuwag na ang mga gang o pangkat-pangkat ng mga preso sa loob ng New Bilibid Prisons (NBP) sa Muntinlupa City.
Ayon ito sa pahayag kahapon ni Bureau of Corrections (BuCor) Director General Nicanor Faeldon, bunsod nang paglagda sa isang manifesto ng mga lider ng iba’t ibang gang o pangkat mula sa humigit kumulang sa 15 grupo.
Kabilang sa mga nanumpa sa harap ni Faeldon ay ang mga lider ng mga matatagal na gang ng mga preso ng NBP tulad ng Batang Mindanao, Batang City Jail, Sigue-Sigue Sputnik, Sigue-Sigue Commando, Genuine Ilokano, Oxo, Batang Mananalo, Batang Cebu, Bahala na Gang, Hapi Go Lucky, Querna, Bicol Region Masbate, Batang Samar, Chinese group at iba pa.
Layon aniya ng naturang kasunduan na mabawasan na ang pagmamando ng mga gang na nagiging sanhi ng kaguluhan at nagiging ugat pa ng sindikato.
Nakiusap naman si Faeldon sa mga lider ng gang na hikayatin ng huwag gumawa ng krimen ang kanilang mga miyembro.
Kahapon ay isa-isang kinausap ni Faeldon at pinagpaliwanagan ang mga lider ng gang bago niya nahikayat na magkaisa at buwagin na ang mga pangkat nila.
Aniya susubaybayan at gagabayan ang nasa 24,000 na bilanggo na nakakulong sa NBP.
- Latest
