Lalaking nagpasabog ng ‘bomba’ sa harap ng GMA-7, arestado
MANILA, Philippines — Arestado ang isang lalaki matapos magpasabog ng molotov bomb sa harapan ng annex building ng GMA-7 sa Quezon City, kahapon ng tanghali.
Ang suspek ay kinilalang si Lawrance Ebio, na nakatira sa Caloocan City.
Ayon kay Sayas Dalire, security guard ng GMA-7, dakong alas-11:30 ng tanghali nang dumaan sa harapan ng GMA-7 ang suspek na may bitbit na apat na bote na improvised molotov bomb.
Huminto ang suspek saka sinindihan ang isang bote na puno ng gasolina at inihagis sa bahagi ng GMA-Network drive at sumabog.
Agad na nagresponde si Dalire at isa pang security officer na si MJ Chan at mabilis ding tumawag ng pulis at inaresto ang suspek.
Nakakulong ngayon sa Quezon City Police District (QCPD) station 10 ang suspek.
Ayon sa mga awtoridad, tila may-sayad o baliw ang suspek dahil panay ang sigaw nito ng “Demokrasya!” at “’Di ninyo ako pinapansin!”.
Gayunman ang ipinagtataka ng pulisya, ay kung saan nakuha ng suspek ang mga dala nitong molotov bomb na siyang subject ngayon sa ginagawang imbestigasyon.
- Latest