NAIA umalerto sa pagdagsa ng pasahero

MANILA, Philippines — Inaasahang sa susu­nod na linggo ay dadagsa na ang pasahero sa Ninoy Aquino International Airport (NAIA) ngayong Kapaskuhan para magbakasyon sa bansa kaya’t dobleng paghihigpit sa seguridad ang ipatutupad ng Manila International Airport Authority (MIAA).

Ayon kay MIAA ge-neral manager Ed Monreal ang pagtaas ng vo-lume ng mga pasahero ay inaasahan ngayong Disyembre hanggang buwan ng Enero kung kaya umapela sila sa mga pasahero na  makipagtulungan sa airport safety at security procedure upang maiwasan ang anumang abala sa kanilang mga biyahe.

Mariing pinaalalahanan ng MIAA at ng Office of Transportation and  Security (OTS) ang mga lokal at dayuhang pasahero, na ilagay sa tray ang mga metal na bagay at electronics devices maging ang kanilang mga sapatos pagpasok sa x-ray scanning sa mga final security checkpoint.

Hiniling din nila sa mga pasahero na huwag silang maglagay ng mga liquid or perfume na higit sa 100 ml., na maaaring kumpiskahin o kaya naman ay itapon sa mga trash can kapag nakita sa x-ray machine para umano sa kanilang seguridad.