1 patay, 1 sugatan sa pamamaril sa Tondo
MANILA, Philippines — Utas ang isang lalaki habang sugatan ang isang dalagita na pinaniniwala-ang nadamay lang sa naganap na pamamaril sa Tondo, Maynila, kahapon ng mada-ling araw.
Dead-on-the-spot ang biktimang si Dominic Maquirang, 38, residente ng Gate 8, Parola Compound Tondo, dahil sa tinamong tama ng bala sa leeg.
Ginagamot naman sa Tondo Medical Center si Ricalyn Luto, 17, dahil sa tinamong tama ng bala sa braso at bahagi ng dibdib.
Itinurong gunman ang isang alyas Benjie , residente ng Building 20 Temporary Housing, Aroma Compound , Tondo na tinutugis na ng mga awtoridad.
Sa ulat ni PO3 Joel Ascano ng Manila Police District-Homicide Section, dakong alas-12:15 ng madaling araw, nang maganap ang insidente sa Aroma Compound, Tondo.
Nakikipag-inuman umano ang sugatang dalagita sa isang Dorothy Ventura nang dumating ang nasawing si Maquirang at iniaalok ang dalang relos.
Sa gitna ng pag-uusap ay doon na umalingawngaw ang putok ng baril kung saan duguang humandusay si Maquirang sa kalye habang nakitang duguan din ang dalagita na tinamaan ng ligaw na bala. Inaalam pa ang motibo sa pamamaslang.
- Latest
